Антоний Поссевин Письмо к царским послам 1586 г.

549 л. А се списокъ с Онтоньевы грамоты к посломъ.

Божіею милостію великого государя царя и великого князя Ивана Васильевича государя всеа Русіи и великого князя володимерского, московского, новгородцкого, царя казанского и царя астороханского, государя псковского и великого князя смоленского, тверского, югорского, пермского, вятцкого, болгарского и иныхъ его царского величества посломъ великимъ дворянину и намѣснику Кашинскому князю Дмитрею Петровичю Елетцкому, да дворянину и намѣснику Козелскому Роману Васильевичю Олѳерьеву, да дьяку Никитѣ Басенку Никитину сыну Верещагину, да подьячему государскому Захарью Свиязеву от навышшего пастыря во крестьянстве отца святого панежа Григорья  посолъ Антоней Посевинусъ. Василей Замескій служебникъ мой отдалъ мнѣ грамоту от васъ, а яз товож часу говорилъ есми с королемъ с Степаномъ о моемъ

49

с вами сьеханью, на которое мѣсто и которого часу, чтоб мнѣ с вами сьѣхатись в дорозе с великими послы государьскими. Вѣдайте ж о томъ, что и я заѳтра, дастъ Богъ, в середу отселе, выеду и поеду убо к Порхову к селу к Бишковичемъ и Нашеломкомъ недалече Порхова в десять верстъ и Опоки, а я тамъ, дастъ Богъ, в четвергъ або в пятницу пріѣхавши, товож часу пошло к вамъ людей Королевыхъ, чтоб васъ бережно к тому селу до Бышковичь и Пашеломокъ припровадили, а тамъ я с вами съѣхавшись и приговоръ вдѣлавши о дѣлѣ добромъ, оттуль же прямо к Заполскому яму поѣдемо, а тамъ же и послы великіе короля Стеѳана в борзе пріѣдутъ; а в послехъ идутъ ясневелможные панове ихъ милость князь Янушъ Николаевичъ Збарежски, воевода брясловскій, староста кременитцкій, а его милость панъ Олбрыхтъ Миколаевичь Радивилъ княже на Олыце и Несвижю, моршалокъ надворный великого княжства литовского, староста ковенскій, с писарми по обычею давнымъ, а идутъ во трехъ сотъ конехъ; про то вы, как скоро сю мою грамоту прочтете, у дорогу ко мнѣ пускайтесь. А король приказалъ, чтоб вамъ вездѣ бережно было, что дай Господи, а бы се тое дѣло к славе имени Господнему скончало, а кровь бы се крестьянская не лила, а поганинъ невѣрный непріятель роду крестьянского не тѣшилъ бы ся и не радовалъ, в которомъ дѣлѣ ся ми, дастъ Богъ, прямою моею къ государю своему познаете. За тыемъ его царскому величеству челомъ бью, зычечи его милости и государствомъ его прямого миру. Писана в обозе короля Стеѳана подо Псковомъ лѣта отъ Рождества Христова -го (!).