Грамота п. Досифея Московскому патриарху Адриану, писанная в мае 1696 года, в которой он благодарит Адриана за дары и милостыню, присланную им в Иерусалим, заявляет, что учителя и справщика не присылает в Москву ради трудного времени, и отвечает Адриану н

№ 20

Грамота п. Досифея Московскому патриарху Адриану, писанная в мае 1696 года, в которой он благодарит Адриана за дары и милостыню, присланную им в Иерусалим, заявляет, что учителя и справщика не присылает в Москву ради трудного времени, и отвечает Адриану на его запрос о некоем Дионисии Жабокрицком.

Блаженнейший и святейший господине кир Адриане, архиепископе царствующаго великаго града Москвы и всея Росии и всех северных стран патриарше, в Дусе Святем брате возлюбленный и сослужителю нашея мерности, блаженство твое сладце и радостно и братственно целуем, молящеся Господу нашему Иисусу Христу, яко да направляет стопы твоя на путь мирен.

Пречестныя вашя грамоты и от благоутробия твоего происходящая дары, еже есть священное и удивительное Евангелие и кандилы златосребренныя и милость, вся прияхом в целости, и дашася тамо в приличная места во славу Божию и вам в честь, славу и похвалу и в вечное воспоминание. И воистину милость твоя тамо отцем сущим велие утешение бысть; Господь един весть в каковых нуждах обретаемся и мы зде, а отцы труждающиися тамо: долги, убытки, клеветы и напраслены непрестанныя, дани несносныя, а христиане мнози во убожество от того приидоша и места некая, которые помо-

78

гали нам, сиречь: сербская земля, болгарская, волоская, Еллада и Македония от сих нападков вельми изнемогли. Прочее благодарствуем зело Бога умоляюще за утешение ваше, наипаче же возблагодарит вас богатый в милости Бог, увенчевая вас всех премногою своего милостию и щедротами и мы, приявше время, благопотребно будем писати божественной твоей любви пространнее о Господе, Ему же буди слава во веки. А что не писал пространнее, прощения прошу.

Едва же ныне обрел средство, с кем бы таковая восписати, средство же верное: обретох благочестиваго государя угровлахийскаго Константина, который человек есть Божий и вашему православному царству верный радетель, и сохранит восписания сия.

Учителя и справщика не прислали еще труднаго ради времене, зане зде не токмо ныне писал бы кто к вам, но кто бы и имя ваше из уст изнес, смертную казнь приимет. И не дивно, ниже странно есть сие, зане диавол четыредесять пять лет возбранял и припинал создати святая святых, и ныне видя, что печатаются и хотят печататися книги во утверждение благочестия в православных местех, како не будет препинати? И блаженнаго Павла препинал от проповеди, но Божественная сила не побеждена и не одолена есть. Сего ради благоволит Бог, что приидут к вам и человецы довольни во время благопотребно к совершению начатого и помяненнаго дела.

Прииде к нам и грамота ваша, в ней же пишете константинопольскому святейшему патриарху о некоем Дионисие Жабокрицком, который имел жену вдову, ныне же достойну ли быти ему, яко ревнителю Церквам, епископу Луцкому? И сию грамоту вашу послахом всесвятейшему в Царьград и писахом, чтобы он ответ вам дал по некоему образцу, яко вопрошающим. Обаче глаголем, яко сему быти не возможно и никое строение не вмещается, зане возбранено есть не только от поместных избранных отцев, но и от вселенских соборов и от самого Писания, и не токмо вселенский патриарх со всем своим освященным собором, но хотя вси патриархи и епископи воедино соберутся, не могут такое строение сотворити и пременити, что обще определено, и обще предано, и обще отречено. Отнележе Господь прииде на землю и даже до ныне, сицево строение ниже бысть, ниже бывает, ниже будет во Церкви Божий. Тем же ниже твоя святыня может сотворити, о чесом ниже вопрошати подобало. Аще же той Дионисий человек честный, да учинится от него промысл, чтобы инаго человека обрести честна во епископа, к сему да помогает и он церкви Божий, елико может, якоже и

79

мнози монаси токмо помогаше церквам Божиим, и трудишася за тыя в различная времена зело премного. Господь глаголет: доброе несть добро, еще недобре будет; не правым же и беззаконным образом церкви Бога живаго никто может служити, но право приносяща приемлет; аще же не приемлет и отвращается, по чесому Бог на жертву тую не внимает? К сему же еще и порок о сем случаи во церкви Божий будет, о чесом папежницы униаты будут вопити до небес и глаголати, яко церковь восточная подпаде ереси, приемлюще во иерейство вдовам посягающия. И самые лютеры и калвини будут оправдатися и печатать в книгах своих глаголюще, яко восточная церковь приобщилась нам по нечесому приемлюще во иерейство посягщия вдовам, и что поносится Лютер и Калвин сицевая законополагающе? Мартин аще растлився деве некоей и извергайся из церкве, новопостави ересь, и прельстил тысящы тысящей, но не попустиша тому священнодействовати отцы. Дионисиева же сожительница, аще и не блудница была, но равно со блудом брак вдовы отлучается от иерейства, зане аще архиерей древняго завета, сени служай, не можаше взяти вдову, кольми паче в новом завете, кто сие сотворив, возмог или есть епископ, или хотя меньшее — иерей или диакон? Тем же сему быти не возможно, наипаче же невозможных невозможнейшее. По сих аще и будем писати ответ некий константинопольскаго святейшаго, обаче яко же пишем мы, тако и он будет писати, и иначе ему писати невозможно. Ко оному же, что пишет блаженство твое, яко мнози тамо от православных отвлекаются в папежство и униатство прелыцаеми и нужда строению быти, глаголем: яко святии отцы положиша строение во многих, обаяе суть некая, которая приемлют строение, сие же строение неприятно есть. Вы по благодати Божией можете многими образы иными, имеюще Бога споборника во всем помощи обретающимся тамо православным, к сицевым же ниже слух ваш простирайте, зане православный самодержец защитник зовется и содержатель православныя веры не в нечесом, но во всем добре от святых отец определенном, не попущая ни единого новоразсецати и новоуставляти ниже в малейшем чесом. Глаголет бо великий Тарасий в первом деянии святаго вселенскаго седьмаго собора: еже бо в догматах, или великих, или малых согрешати, тоежде есть; из обоих бо закон Божий отвергается. Писаше и святейший Фотий патриарх к папе римскому Николаю, глоголя: суть всем обща вся хранити понужде подобает и прежде всех церковныя вещы, зде и премало согрешати грехом ко смерти. Сия к братству твоему пищу в любви, не у чаще, но

80

напоминающе и советующе, да удаляетеся от таковых строений яко от змия, еже бы сохраните вам славу восточныя святыя церкве, тожде рещи кафолические и апостольския, еже есть право правити в ней слово истины без всякаго новосечения и новопоставления, яко да возможеши глаголати с апостолом: течение соверших, веру соблюдох, прочее готовится мне правды венец, его да даст мне Господь во оный день, иже и в сем веде да сотворит лета твоя премнога и блага и всякого навождения превыша. 1696 года майя месяца, Досифей, милостию Божиею патриарх святаго града Иерусалима и о Христе брат.

А под этим его же рукою приписано:

Божественнейший брате! имехом еще писати братственной твоей любви и иная некая нужная, но посылаем архимандрита Хрисанфа в Волоскую землю, повелехом ему писати оттуду вся твоему блаженству, и прошу о всем, о чем будет он писати, попекитеся к совершенно просимому привести, да и за сия умножается тебе мзда у Бога. Досифей.