Макарий, патр. Антиохийский Грамота к патриарху Никону от 15 декабря 1656 г.

«Макарие милостию божиею патриарх святаго божия града великия Антиохии и всего востока. Блаженнейший и честнейший брате и съслужителю господа, господи Никоне, архиепископе и патриарха богоспасаемаго и царственнейшаго Москова и всея великия и малыя и белоя Россия. Блаженству вашему вседушне кланяюся, молитвоствующе о всех благ душевных же и телесных. Абие в онь же час достизахом в сих христианских части угровлахийския, искахом всетрудне, да обрящем премудрое впрошение о хотящих креститися сиречь и котории не подобает покрещавати, и елико убо о калвинех и лютерех, якожь суть господственне еретици и священство ниже имуть, ниж похотевають прияти с яко тайну, и отметають е, и отвращаются его, покрещаваем, яко крещение их несть правильно, ниже священно; ащеж и неции сих ради еще сматрят, яко и в време нужды мирский человек может крещати, якож крести отроча сый священный Афанасий и крещение оно приать тогдашний патриарх александрийский Александр; еликож о латинях, понеже и священство имуть и всех седм тайн приемлють, последует и крещение их в еже быти цело и добро, истинствовахже множае от некоего древнего грецкого и словенского номоканона, иже ми указа преосвященнейший митрополит угровлахийский господин Стефан, в немже слове приносит и о латинех, како суть добре крещена, понеже крещена суть в имя Отца и Сына и Святого Духа, и елицы крещаются неизменне,

— 773 —

в призывание Святыя Троицы, право суть крещени, елицыж евангельское предание отметают, зле суть крещени, яко отвращают слово Господне глаголющее: идете научете вся языки крещающе их в имя Отца и Сына и святого Духа. Елицы убо покрещавают крещенные, впадают в ереси второкрещенцев, иже покрещавают правокрещение и отвращают сложение веры православные, еже глаголет: исповедаю едино крещение в оставление грехов, и слово святого Павла сущее к евреом в главе шестом: невозможно бо единою просвещенных паки обновляти в покаяние, второе распинающе себе Сына Божия и обличающе. Яко три тайны суть, иже дают знамение и неистираемый характир в душах наших, крещение, миро, и священство, отнюдуже глаголется, знамение или печать неистерется царского ради знамения, яже печатлеются внутрь души. Седмь соборов исповедуем мы всточницы, и сия точне исповедают и западницы, яже кальвины и лутеры, яко иконоборцы, неприемлют седмаго вселенскаго собора, якож и шестаго не приемлют монофелите (сиречь единовольницы), пятаго оригенстии, четвертаго армены и яковите, третьего несториани, второго евномиани, первагож ариани. Понеже убо и седмыя соборы, якож и седмыя тайны, святыя мощи и святая запечатления святых латини поклоняются, и чтут, неподобает осуждатися в тайных, иже взимают и дають, понеж всих дающе и взимающе, не съгрешают, ниж достоини осуждению. Ащеж не имеют крещение, яже есть ключ тайн, кое есть христианство их, кое есть священство их; не священниже латини, никтож от наших рече, никтоже дрзнув вторицею хиротонисати их, точию архиерей облачит их, глаголюще на каждое облачение одежды псаломскиа стихи, ихже обыкохом глаголати и мы, егда облачимся прежде службы, кроме ни единоя оноя молитвы рукоположения, точию егда одеют их вручает книгу службы, и в время причащения причащает их, яко же и прочий другие священницы новохиротонисаны, яко вси ведят и познавают латины схизматики токмо, схизма же не творит человека неверна и некрещенна,

— 774 —

точию творит и отлученна от церкви и вкупе сбрани. Темже всеосвященный Марко Ефесский, спротивник латином, никогдаже рече латином, яко имут покрещаватися, вменяюще и утверждающе крещение их правильне, понеж бывает по чину церкве нашея призыванием святые Троицы. Ащеж и восхощем отлучити толиких от христианства, в многое впадем тесновмещение, и зело умалеем имя и стадо Христово, еже есть зле и вне от духовного устроения и сшествия, иже отверзает милосердие всем и приемлет взращающихся в покаянии, якож и наши сгрешающе приемлем, егда взращаются на покаяние. Сие и таковое взмнися на подобное назначити нам к блаженству вашему, и да приимете благосердне и чистым любовием, яко чистым съвестиемь назнаменахом. От Терговитцех 1657 от Христова рождества месяца декабря 25 день».