Пророчество преп. Зосимы

III.

ПРОРОЧЕСТВО ОТЦА НАШЕГО ЗОСИМЫ, НАЧАЛЬНИКА МОНАСТЫРЮ НАШЕМУ

(к стр. 203, примеч. 1)

Се же рече ученику своему, се аз, чадо, отхожю от вас телом, а душею всегда с вами буду; да и се вам буди разумно: аще имам дерзновение пред Богом, то распространить Бог место се и буде монастырь велик; аще ли ни, то оскудеет. И мы, братие, се видяще, разумеем: Бог прославил место се и монастырь величеством пространен и устроен всяким устроением, молитвами отца нашего Зосимы. И се конечное слово вздохнув и рече ми: чадо! будет нелюбовь велика у вас и будут брани велики. И се, братие, пишу вам, да не забвено будет пророчество отца нашего Зосимы. Сбысть же ся нам проречение его за 30 лет и 2 лета по преставлении его. Прииде к нам человек болярский и потом два иных и по лете едином два и все приаша иноческий образ, и един от них по триех летех приат священничества сан. И начата те мниси, иже преже быша болярские люди, жити и превозносящеся высокоумением гордяси,

460

и присовокупиша к себе иных братью ласкордством по своему их обычаю и начата ропот вздвизати на игумена, которой их постриг, именем Исайя, такоже и на иных братью начата величанием гордитися, и воздвигоша на игумена брань велику, хотяще своего священника поставити на игуменство, и много о сем брань вздвизающе не по едино лето. Игумен Исайя много скорбей претреце, и уже не могый терпети и остави игуменство. И по малех днех нарекоша своего священника на игуменство, и по сем поидоша в В. Новгород к владыце благословение взяти, и владыка его не благословил на игуменство, но иного посла на игуменство в монастырь. По мале времени вздвигоша и на сего брань велику и тако и того сгнаша с игуменства и по мале времени нарекоша игумена, егоже не благословил владыка, съветники его, а иныя братия не хотели, и о том в братии стала брань и нелюбовь велика, а игумен нареченой нача не любити братьи, которие его не хотели на игуменство, а к владыце посылал по два лета трижды благословеной грамоты просити, и владыка ему не дал. И братия учали говорить, которые его не хотели игуменом: игумен, уже ты много убытка монастырю чинишь, посылаешь к владыце по благословеную втретьи, и владыка тебе не даст благословеной и не благословляет, и ты нам не игумен. И игумен нача зле глаголати с озлоблением, и братиа у него взяли посох игуменской силой, да и сами нарядясь поехали к Москве к великому князю, и игумен после них послал старца, своего советника, с грамотою на берег, велел тех старцев бити и грабити, хотел их уняти, чтобы они не шли к Москве (Здесь прерывается рассказ в сборнике).